Pelajar Sekula

Kitai nyau ka datai ba bulan 2. Gawai pen majak ngansak sesemak, nyau nadai berasai ari beganti. Ngagai bala nembiak ke ngambi peresa SPM taun nyin kemarik, nyau majak kesal asai ati nganti pemutus, nda piak? 

Kati udah bisi ba runding bala nembiak semua, nama pelajar ka diambi kita pengudah nerima pemutus peresa SPM tu ila? Ngagai bala ke bedau agi ngisi borang UPU, tau berengkah ngisi diatu borang UPU (tarikh tutup: 5 April 2016). Kita tau nemu enggau silik agi pasal UPU tu ba laman web UPU ( http://upu.mohe.gov.my/web/  ). Siti pesan aku ngagai bala menyadi ke benung nganti pemutus peresa, manah tauka nda manah pemutus peresa kita ila, isi aja form nuju palan pelajar ke bisi diatu. Kitai enda nemu nama utai ti ulih kita ila. 

Bisi sekeda ke kala dipeda ba taun ti udah, meda pemutus peresa SPM diri enda entu mujur, lalu badu nyambung pelajar. Anang bakanyak bala menyadi, agi maioh peluang belajar ke bukai ti ulih diambi kitai. Ambi ke chunto, kita mega tau nyambung pelajar ba Institut Kemahiran Belia Negara (IKBN) enggau ba Institut Latihan Perindustrian (ILP). Kita mega tau berengkah ngisi form tama ngagai IKBN diatu (tarikh tutup: 5 April 2016). 

Gambar diambi ari: www.freepik.com

Bala menyadi, sigi enda kala senang pengidup kitai ti belajar. Nadai kala urang nyebut senang, tang nengah pemandai enggau pengelandik aja kitai ulih ngubah pengidup diri enggau sebilik. Semua tu bepanggai ba kita empu bala menyadi, meseti ka ngembuan juluk ati lalu ari nyak ransing ati nyapai juluk ati kita.

Aku ngambi jako ari Tr.Michael Jalak(ari menua Sibu):

"Tu meh pemujur ti deka dipeda kami ngambika ulih besemekih ba pengidup enggau bansa bukai ba dunya ke majak mansang". -Borneo Post

Tr.Michael Jalak siko ari tuai rumah ti ngemeratka pelajar sekula lalu rumah panjai tu mega udah nyadi chunto ba menua Sibu. Admin cukup gaga ati meda rumah panjai tu bisi ngembuan palan alai bala nembiak belajar lebuh maya lepa. Engka tu tau dititih ke kitai ba Sg.Ipoh ianya ngembuan mini-library tauka palan belajar. 

Ngagai sida ti agi besekula, belajar bebendar lalu titih ke pesan bala pengajar. Ngagai ia ke benung nganti pemutus SPM, anang kelalu irau ati tang semampai besampi ngambi ke pemutus peresa nyak ila tau mai kita jauh agi dalam pelajar.

Ps: Gaga ati meda bala menyadi ba Sg.Ipoh nyau udah maioh ngena topi segi empat diatu.