Baka selama, 3 ari bejurut gerenti ditetapka endur berami. Tang saritu aku mina ka nusi program sari 31.5.2013 ianya malam nganti ka ngirup ai pengayu.
Malam 30.5.2013, bala komiti pengerami bela bebungkus sida perais kena pekit gawai taun tu. terima kasih Ms.Roslynda & Ms.Elsie(lain kali tolong lagi yer!)
Pagi baka selama, bala bela bebela ke pemakai baka jani, manuk enggau pulut. Tumu2 pagi Apai Setia udah malu tawak ngasuh bala mensia dani(kebendar ia ngerak bala anak dani).
Ngalih ke tengah ari, bala komiti pengerami belabuh ngerias ranyai.
Pa pemaioh buah ranyai, nyau patah dan pun pisang. Taun siti sigi enda tau nguna pun pisang agi nyadi ranyai. Nyau bendar tudah bala nungkat ranyai enggai ke majak tumbang. Nasib ulih selamat.
Lemai nyak, kami bisi ngatur pekit mewarna bagi anak mit enggau urang tuai.Maya tu meh kitai meda bala indai enggau inik berentap nyadi urang ke paling badas mewarna. sigi lain amai chara sida ia mewarna.
Program malam belabuh kira-kira jam 9 malam.
Pekit ke bisi dipetanding ka malam nyak
a) Newspaper Fashion Challenge
b) Pekit Nikau Duit Syiling
c) Pekit Ngumpul Gula batu
Jam 11.30 malam semua program ngetu magang laban ka sembiang dulu.
Jam 12 malam belabuh meh munyi mercun nanda ke udah cukup jam ngirup ai pengayu. Aki Engkala nyadi tuai biau ranyai ke taun tu.
Ngarap ke taun tu tau mai pemaik ngagai semua, ia ke kereja bulih utai, ia ke dara bulih laki, ia ke bujang bulih bini..piak meh ia..ia ke enda ulih cuti taunt u, arap ke bulih cuti taun siti.
Baka selama, udah duduk enggau sebilik diri empu, bela ngabang ngagai ruai ke bukai.
Dinga aku program malam nyak ambis kira-kira jam 4.30 pagi. Aku nadai ulih meda urang lama laban ke udah kelalu lelak, mupuk dulu tinduk.
Malam nyak mega aku bisi ninga bisi pengabang ari bansa bukai datai ngabang dibai bala ari Rh.Bugat. Tang sayau amai bala cameraman aku nadai siko ngambi gambar. Nganti aku nguji nanya agi ba bala sida ke bukai enti bisi ngambi gambar malam nyak.
Okaylah datai ditu dulu cerita aku. Pegila aku nulis cerita pasal ari 1.6.2013 enggau 2.6.2013..
Sekali agi ngagai bala ka bisi datai ba blog tu,
Selamat Ari Gawai!
