Cherita Minta Ari Ujan

Nyadi ngiling bidai taun 2013 ditetapka kena 6.7.2013. Asai aku nemu magang bala kita maya nyak musim kemarau. Ni ke musim jerebu. Ka pemaioh tangki kami serumah nemu meh rangkai. Nyau ulih ngelimat ke ai.

Nyadi sari ari minggu 30.6.2013, kami begempuru meeting netap ke semua atur. Sebedau nyak, kami bisi sembiang gempuru (sembiang ari minggu). Nyadi aku agi ingat ke leka sampi Aki Cikgu Angkau (apai Gait) pagi nyak ti besampi ke minta ari ujan ba rumah panjai kami tu. Aku nemu gerenti bisi sekeda kitak ka ketawa ninga leka sampi nyak, tang aku enggau kami serumah mega dalam ati besampi ke utai ti sama baka enggau ia. Nampak mustahil munyi ko jako urang(udah ga ngenyala amai ari panas bisa sarinyak), tang sampi ti datai ari ati urang ti pechaya sigi didinga Apai kitai di serega.

Tembu sembiang, kami pen meeting lalu buah randau ti amat penting ianya masalah ai. Bemacham meh chara dirunding ke bakani ka ngiga ai maya pengerami ila. Pengambis meeting bala pen nguji ke chara ti udah dikerandau dalam meeting ianya ngepam ai ari sungai (tu kereja sida ke lelaki magang tu).

Tang enda mukai-mukai, ari ti panas bisa pagi nyak, nyau belabuh bemua ngilah tengah ari. “enda ari nyak nyadi ujan” munyi ko sekeda, tang munyi ko aku tadi leka sampi urang ti pechaya sigi didinga Apai.

Ari pen ujan enda lama udah nyak. Taja pen ujan enda lama, tang cukup meh kena ngisi tangki ti kosong. Tang nyelai ia, ba endur kami nyak aja pansa ujan. Hurm..

Lalu sari sebedau pengerami, ari ujan ari pagi datai ke malam. Nyak ukai mina penuh tangki, nyau mungkar diayah ke ai enggau aku.

Sigi besai kuasa Apai, aku arap ke bala kita mega seruran pechaya ke-Iya. Dalam setiap penusah kitai enda ngira mit tauka besai ( logic ke enda logic) , asal kitai arap, Ia sigi nulung kitai belama.

Ngambi Pengabang 2.6.2013

Okay, sambung baru cherita ari Gawai rumah panjai kami.

Sari 2.6.2013, kami ngambi bala pengabang ari TR.Bugat. Program belabuh jam 2 lemai. Ari pagi bala dah besedia ke pemakai enggau semua utai ti patut dikereja. Kira ke pengawa besai ga tu, laban bedau kala kami ke biak meda atur ngambi pengabang bakatu. Selalu ia enti pengabang datai sida lalu duduk sereta makai. Sekali tu pengabang sigi disambut enggau penuh adat. Terima kasih ngagai bala aya ibuk ti udah meri peluang kami meda pengerami tu.

Bala ke datai..hurm..sigi umbas pemaioh ia. Ukai mina bala ari Tr.Bugat aja datai, bala ari Rh Limai/Entawai pen bisi..

Kami serumah panjai sigi meri terima kasih ngagai semua bala pengabang ti udah datai. Kami mega berasai gaga laban pengudah bendar ngambis ke ai tangki dalam 3 ari nyak, ujan datai ba malam ari 2.6.2013. Puji Tuhan! Pemuas ia bemua ari, bisi ga ujan..

Enjoy meda gambar ba baruh tu.. :-)

bala penari Sg.Ipoh

Bala pengabang ari Rh.Bugat

Empa magang pemakai ke udah disedia ka..

team rumah baruh datai ngabang! Tenkiu ngagai bala kita ke sporting belama..

Cherita ari Gawai tu deka disambung enggau pengerami Ngiling Bidai 2013. 

Nyambut Gawai 1.6.2013

Hello semua! Nama berita bala kitak wai? Arap ke mujur sereta gerai belama. Nyadi asai aku laun amai aku deka nyambung cherita pengerami ari Gawai sarinyak.

Sambung cherita pengerami kami kena ke sari 1.6.2013.

Pagi 1.6.2013 baka selama nemu-nemu meh bala kitai, bala mensia sigi tumbang magang. Tang taun tu bisi lain mimit peda aku ba kami serumah. Tumu magang sida ia dani tajapen udah bendar malam ari. 

Rancangan ari 1.6.2013, ngipa pengabang datai enggau nurun ngabang. Nyadi kami sebuat ngabang ngagai bala kaban belayan ba Rh.Limai/Entawai. Kira ke setengah ari bisi kami ba rumah panjai baruh din.

Ngilah ke lemai, jam 4 bakanyak team rumah baruh(Rh.Limai) datai ngabang. Berengkah baru meh pengawa belagu, ia ke betanda ngasak meh diak. Nyadi lagu popular taun tu, “anang ngansak sesemak” ari wendy. Lalu meh bala ibuk begaga ke marik “emas” mesai pinggai.

Kira jam 7 bakanyak, pulai meh bala pengabang. Tang program sari 1.6.2013 ukai semina nyak aja. Program pekit malam ari disambung baru lalu berengkah jam 8.30 malam. Baka selama, bala komiti Gawai sigi maioh macham main dikena ngerami Gawai.

Pekit ke terubah,Pekit Baris Paling Panjai..Ambis tengkira ba tubuh enggau ba ruai dikena ngaga baris paling panjai.

Udahnyak, Pekit Ai Beer. Anang saru auk, pekit ai beer tu ukai pekit ngirup ai beer, tang pekit ti nentu ke sapa ulih ngambu nama ai beer ke di beri asuh sida ia.

Malam nyak kami mega bisi pekit Fancy Dress anak mit enggau Pekit Fancy Dress Bala Indai.

Dah puas bepekit, kitai poco-poco..

Pekit Makai Biskut tu pekit ti lucu ga. Maioh kitai ngumbai ulih makai biskut tu enggau laju, tang malam nyak nunjuk ka enda semua kitai ulih makai biskut tu munyi ko jako.

Baka selama, dah puas bemain, jam kitai makai agi..enti kita datai ngabang tauka enggau kami berami ila anang irau pasal pemakai. Kami sigi nyendia makai lemai enggau makai tengah malam. Endur mandi pen bisi mega disedia ka (Sg.Ipoh), peninduk pen bisi(manah ruai kami wai endur gali).

Auk leka ke aku naka tu dulu cherita 1.6.2013..betemu kitai ba cherita 2.6.2013(ari ngambi pengabang)